काठमाडौं/ पशुपति क्षेत्र विकास कोषका सदस्यसचिव सुशील नाहटालाई पशुपतिनाथ मन्दिर क्षेत्रमै बुधबार आक्रमण भएको छ । पशुपति मन्दिर परिसरमा रहेको वनकाली धर्मशालामा मासु पकाउन नमिल्ने भनी सम्झाउन जाँदा क्याटरिङधनी र धर्मशालाका युवाहरूले आक्रमण गरेका हुन् ।
सो क्षेत्रमा पहिलादेखि नै देवी कन्स्ट्रक्सन प्रालिले क्याटरिङ चलाउँदै आएको र मासुको संगत गर्न नमिल्ने भए पनि भोजभतेरमा मासुको कारोबार गराउँदै आएको गुनासो आएपछि आफू सम्झाउन जाँदा आक्रमण भएको नाहटाले बताए । प्रहरीले क्याटरिङका ठेकेदारलाई पक्राउ गरेको तथा आक्रमणमा संलग्नको खोजी भइरहेको जनाएको छ ।