नयाँ पत्रिका
काठमाडौं, २५ असार
समाचार लेखेकै विषयमा कञ्चनजंघा फुड एन्ड वेभरेज प्ा्रालिका सञ्चालक हरि सिटौलाले नयाँ पत्रिकाकर्मी अजित अधिकारीलाई धम्क्याएका छन् । लाजिम्पाटस्थित आन्तरिक राजस्व विभागकै कार्यालयलाई बेचिएको पानीमा  किरा भेटिएको समाचार शनिबार नयाँ पत्रिकामा प्रकाशित भएको थियो ।
पानीमा किरा भेटिएपछि आन्तरिक राजस्व विभागले नै कारबाहीका लागि वाणिज्य विभागलाई पत्र लेखेको थियो । तर, जनस्वास्थ्यमाथि आफूले गरेको गम्भीर खेलवाड महसुस गरी गल्ती सच्याउनुको सट्टा सिटौलाले समाचार सच्याउने प्रयासमा लागेका छन् । समाचारको भुलसुधार गर्न भन्दै उनले सोमबार वाणिज्य विभागमै कर्मचारीकै अगाडि अधिकारीलाई धम्काएका हुन् ।
उनले पत्रकारको हातखुट्टा भाँच्ने उद्देश्यले आफू विभागमा आएको पनि दाबी गरे । 'पत्रकार कुटिनुको कारण यस्तै समाचार लेखेर हो, आज पनि तपाईंलाई कुट्न भनेर आएका थियौँ, ठीकै छ बच्नु भयो, अब किरा परेको समाचारलाई गल्ती भएको भनी क्षमायाचना लेख्नुहोला,' धम्की दिँदै सिटौलाले भने ।
सिटौलाले कञ्चनजंघा फुड एन्ड
वेभरेज प्ा्रालिको पानी शुद्ध भएको दाबी गरे पनि सरकारी निकाय आन्तरिक राजस्व विभागले नै उत्पादकविरुद्ध वाणिज्य विभागमा उजुरी गरेको हो । उजुरीपत्र नयाँ पत्रिकाले प्राप्त गरेको छ, जसमा कञ्चनजंघाको पानीमा किरा भेटिएको ठोकुवा गरिएको छ ।  पत्रमा 'कञ्चनजंघा
वेभरेजद्वारा उत्पादित हाम्रो स्वास्थ्य, प्रशोधित पिउने पानीको सिलबन्दी जारभित्र किरा भेटिएकाले छानबिन तथा कारबाही गर्न' अनुरोध गरिएको छ । आन्तरिक राजस्व्ा विभागको पत्रपछि वाणिज्य विभागले कञ्चनजंघाका सञ्चालक सिटौलालाई स्पष्टीकरण सोधेको थियो ।
समाचार संकलनका क्रममा संवाददाता अधिकारी सोमबार वाणिज्य विभाग गएका थिए । सिटौला पनि विभागमा स्पष्टीकरणपत्र बुझाउन गएका थिए । योबीचमा उनले पानी प्रशोधनमा गल्ती भएको भए सुधार गर्छु भनेनन्, बरु पत्रकारलाई धम्क्याएर खण्डन छाप्न दबाब दिँदै थिए ।
वाणिज्य तथा आपूर्ति व्यवस्थापन विभागका अनुसार आन्तरिक राजस्व विभागका शाखा अधिकृत बलराम सापकोटाले किरा परेको जारको पानी लिएर उजुरी हाल्न आएका थिए । 'पहिले फोनबाट जारको पानीमा किरा परेको भनी उजुरी आएको थियो । मैले उजुरी गर्न विभागमै आउनु भनेपछि पत्र र जार बोकेर शाखा अधिकृत बलराम सापकोटा आएका हुन्,' विभागका अनुमगन निरीक्षक एकदेव अधिकारीले भने ।