एजेन्सी
नयाँदिल्ली, ८ पुस
गत आइतबार एक युवतीमाथि भएको बलात्कारविरुद्धको प्रदर्शन सातौँ दिन पनि भारतभर जारी छ । राजधानी नयाँदिल्लीमा केही दिनदेखि जारी प्रदर्शन रोक्न सरकारले इन्डिया गेट तथा विजय चोक इलाकामा धारा १४४ लागू गरे पनि प्रदर्शन नियन्त्रणमा आउन सकेको छैन । धारा १४४ अनुसार निषेधित क्षेत्रमा पाँचजनाभन्दा बढी मानिस एकसाथ भेला हुन पाइनेछैन । त्यस्तै, प्रधानमन्त्री तथा राष्ट्रपति निवासवरपरका मेट्रो स्टेसन अर्को सूचना जारी नभएसम्मका लागि बन्द गर्न निर्देशन दिइएको छ । संसद् भवन तथा राष्ट्रपति निवासवरपर प्रदर्शन गर्न निधेष गरिएको सूचना सरकारले बिहानै सार्वजनिक गरेको थियो ।
सरकारको निषेधाज्ञालाई अवज्ञा गर्दै इन्डिया गेटमा भेला भएका हजारौँ प्रदर्शनकारीले सरकार तथा प्रहरीविरुद्ध नाराबाजी गरेका छन् । प्रदर्शनकारीले प्रहरीमाथि ढुंगामुढा, पानीको बोतल तथा रड प्रहार गरेका थिए । प्रदर्शन नियन्त्रण गर्न प्रहरीले दर्जनाँै सेल अश्रुग्यास, पानीको फोहोरा प्रयोग गर्नुका साथै लाठीचार्जसमेत गरेको थियो । घटनामा दर्जनाँै प्रदर्शनकारी तथा केही प्रहरी घाइते भएका छन् । प्रदर्शनमा आम आद्मी पार्टीका अरविन्द केजरीवालको समेत उपस्थित रहेको थियो । केजरीवालका समर्थकलाई ओसार्न ल्याइएको बसको हावा प्रहरीले खोलिदिएको समाचार छ ।
यसअघि राजधानी नयाँदिल्लीमा शनिबार बिहान राष्ट्रपति भवननजिकै रायसिना हिलमा हजाराँै प्रदर्शनकारीले पीडित युवतीलाई न्याय दिनुपर्ने माग गर्दै नाराबाजीसमेत गरेका थिए । प्रहरीको घेरा तोड्दै राष्ट्रपति भवनतिर अघि बढ्न खोजेका प्रदर्शनकारीसँग प्रहरीको झडप भएको थियो । सो झडपमा तीनजना घाइते भएका थिए । शनिबार इन्डिया गेट तथा विजय चोकबाट सुरु भएको प्रदर्शनको सिलसिला राति युपिए प्रमुख सोनिया गान्धीको घरसम्म पुगेको थियो । प्रदर्शनकारीले नाराबाजी गरेपछि गान्धी घरबाहिर निस्केर उनीहरूलाई शान्त रहन आग्रह गरिन् । करिब १५ मिनेट प्रदर्शनकारीसँग वार्ता गरेकी गान्धीले घटनाका दोषीलाई कडा कारबाही गर्ने आश्वासन दिइकी थिइन् । राजधानी दिल्लीका अलावा देशका कैयाँै स्थानमा बलात्कारविरुद्ध प्रदर्शन जारी छ । देशमा लगातार रूपमा बलात्कारको घटना घटिरहे पनि सरकारले यसबारे ठोस कदम नचालेको प्रदर्शनकारीको आरोप छ ।
संयमता अपनाउन सरकारको आग्रह
यसैबीच सरकारले संंयमता अपनाउन प्रदर्शनकारीलाई आग्रह गरेको छ । दिल्लीमा आयोजित पत्रकार सम्मेलनमा गृहमन्त्री सुशीलकुमार सिन्धेले संयम अपनाउन र आफ्नो घर र्फकन प्रदर्श्ानकारीलाई आग्रह गरेका छन् । गृहमन्त्री सिन्धेले पीडित युवतीको बयान सफदरगन्ज अस्पतालमा एक न्यायाधीशले रेकर्ड गरिसकेको बताएका छन् । आफ्ना पनि तीन छोरी रहेको र घटनाका कारण आफू सधैँ चिन्तित रहने गरेको गृहमन्त्री सिन्धेले बताए । सरकारले छिटै छानबिन आयोग गठन गरी घटनाको निष्पक्ष छानबिन गर्ने आश्वासन दिए । सम्मेलनमा गृहमन्त्री सिन्धेका अलावा सूचनामन्त्री मनीष तिवारी तथा गृहराज्यमन्त्री आरपिएन सिंहको समेत सहभागिता थियो ।
बलात्कारीलाई मृत्युदण्डको माग
गतहप्ता दिल्लीमा २३ वषर्ीया युवतीमाथि बलात्कार गर्ने ६ बलात्कारीलाई मृत्युदण्ड दिनुपर्ने माग गर्दै भारतभर प्रदर्शन जारी छ । दिल्लीका प्रदर्शनकारीले गृहमन्त्री सुशीलकुमार सिन्धे र सत्ताधारी कंग्रेस पार्टीका प्रमुख सोनिया गान्धीलाई समेत भेटेर ती अपराधीविरुद्ध मृत्युदण्डको माग गरेको समाचारमा जनाइएको छ । बलात्कारमा संलग्न ६ व्यक्तिलाई प्रहरीले पक्राउ गरी हिरासतमा राखेको छ । सरकारले जनताको क्रोध साम्य पार्न निकै प्रयास गरेको छ, तर पनि दिल्ली, अहमदावाद, पटनालगायत विभिन्न नगरमा प्रदर्शन जारी छन् । भारतमा गतवर्ष भएका दुई लाख ५६ हजार तीन सय २९ हिंसामध्ये दुई लाख २८ हजार ६ सय ५० महिलामाथि भएको देखिएको थियो । त्यस्तै, सन् १९९० को तुलनामा सन् २००८ मा भारतभर बलात्कारका घटना दोब्बर भएका छन् ।