एजेन्सी
ढाका, १२ वैशाख
भवन दुर्घटनामा करिब दुई सय मजदुरको मृत्यु भएको विरोधमा गार्मेन्ट मजदुरले बिहीबार बंगलादेशको राजधानी ढाकामा प्रदर्शन गरेका छन् ।
हातमा लाठी लिएर हजारौँ गार्मेन्ट मजदुर बिहीबार राजधानी ढाकाको सडकमा निस्केका छन् । उनीहरूले गार्मेन्ट मालिकलाई फाँसी दिनुपर्ने माग गरेका छन् । आन्दोलनकारीले बंगलादेश गार्मेन्ट उत्पादन तथा वितरण संघको भवनमा आक्रमणसमेत गरेका छन् । आन्दोलनकारीले केही समय सडक अवरुद्ध पार्नुका साथै केही सवारीसाधनमा तोडफोडसमेत गरेको बंगलादेशको 'डेली स्टार' पत्रिकाले जनाएको छ । बुधबार साभार क्षेत्रमा भएको भवन दुर्घटनामा एक हजारभन्दा बढी घाइते भएका थिए । घाइते कैयाँैको स्थिति गम्भीर रहेकाले मृतकको संख्या अझै बढ्न सक्ने जनाइएको छ । बुधबार भत्केको आठतले भवनको भग्नावशेषमा केही मानिस अझै पुरिएको आशंकामा उद्धार कार्य जारी राखिएको छ ।
बिहीबार निरीक्षणका लागि घटनास्थल पुगेका गृहमन्त्री मुहिउद्दिन खान अलामगिरले संवाददातासँग कुरा गर्दै भवन निर्माण आचारसंहिता उल्लंघन गरी बनाएको पाइएको बताए । उनले दोषीमाथि कडा कारबाही गरिनेसमेत प्रतिबद्धता व्यक्त गरेका छन् ।
भवनका कैयौँ स्थानमा चिरा परेको देखेपछि मजदुरले भवनभित्र छिर्न आनाकानी गरे पनि गार्मेन्ट मेनेजरले केही नहुने भन्दै उनीहरूलाई भवन प्रवेश गर्न आग्रह गरेका थिए । मजदुर कामका लागि भवन प्रवेश गरेको केही समयपछि नै भवन भत्कन सुरु गरेको थियो । दुर्घटनाको समयमा भवनमा करिब दुई हजार मानिस रहेको अग्नि नियन्त्रकले जनाएका छन् ।

राष्ट्रिय शोक

भवन दुर्घटनामा मृत्यु भएकाहरूको सम्झनामा बिहीबार बंगलादेशमा राष्ट्रिय शोक मनाइएको छ । शोक मनाउने क्रममा राष्ट्रिय झण्डा आधा झुकाइएको छ । सेनाका बि्रगेडियर जनरल मोहम्मद सिद्दिकल अलाम सिकन्दरले भवनको भग्नावशेषमा कैयाँै मानिस पुरिएको बताए । दुर्घटना भएको भवनमा कपडा कारखाना, बैंक तथा केही पसल थिए ।
भवन निर्माण संहिता पालना नगरेको
भन्दै दुर्घटनाग्रस्त भवन मालिकविरुद्ध राजधानी विकास प्राधिकरण र प्रहरी दुवैले छुट्टाछुट्टै मुद्दा
दर्ता गरेको स्थानीय प्रहरी प्रमुख मोहम्मद असदुज्जामानले बताए ।
बंगलादेशमा गत नोभेम्बरमा एक गार्मेन्टमा आगलागी हुँदा एक सय १० जनाको मृत्यु भएको थियो । कारखानामा पर्याप्त सुरक्षा प्रबन्ध नमिलाइएका कारण धेरै मानिसको मृत्यु भएको भन्दै प्रदर्शनसमेत भएको थियो । यसअघि सन् २०१० मा ढाकामा चारतले भवन भत्कँदा २५ को मृत्यु भएको थियो ।
भवन निर्माण संहिता पालना नगर्दा बंगलादेशमा समय-समयमा दुर्घटना हुने गरेका छन् । भवन निर्माण संहिता पालना नगरी ठूलाठूला भवन निर्माण गरेकाले त्यस्ता दुर्घटना हुने गरेको बताइएको छ ।

कोलकाता/ पश्चिम बंगालकी मुख्यमन्त्री ममता बनर्जीले धेरै चुरोट पिउन पश्चिम बंगालका जनतालाई सल्लाह दिएकी छिन् । बनर्जीले हालै स्थापना गरेको पाँच सय करोडको कोषमा रकम छिटो जम्मा होस् भन्ने उद्देश्यले यस्तो सल्लाह दिएको बताएकी छिन् ।
यस कोषमा रकम जम्मा गर्न उनले चुरोटमा थप १० प्रतिशत कर लगाउने घोषणा गरेकी छिन् । चुरोटमा लगाइएको करबाट एक सय ५० करोड तथा अन्य स्रोतबाट थप रकम जम्मा गर्ने उनले बताइन् । यस कोषमा बढीभन्दा बढी रकम जम्मा गर्नका लागि ज्यादा चुरोट पिउन उनले आग्रह गरिन् । यद्धपि उनको अभिव्यक्तिप्रति पश्चिम बंगालका जनताले विरोधसमेत जनाएका छन् ।
शारदा ग्रुपका सञ्चालकले गरिब तथा मध्यम वर्गका जनताले गरेको अर्बौं लगानी लिएर फरार भएपछि जनताको पैसा फिर्ता गर्न बनर्जीले कोष खडा गरेकी हुन् । कम्पनीको विषयमा छानबिन गरिरहेको आयोगको प्रतिवेदनका आधारमा लगानीकर्ताको रकम फिर्ता गरिने उनले स्पष्ट पारेकी छिन् । फरार कम्पनीका सञ्चालक सुदीप्त सेनलाई बुधबार जम्मुकस्मिरमा पक्राउ गरिएको थियो । उनलाई बिहीबार अदालतसमेत उपस्थित गराइएको छ । बयानका क्रममा सेनले सत्तारुढ तृणामुल कंग्रेसका केही सांसद तथा पत्रकारसमेतले आफूसँग रकम लिएको खुलासा गरेका छन् ।
गरिब जनताको पैसा लिएर फरार हुने सेनविरुद्ध मुद्दा दायर गरी रकम फिर्ता लिनुको सट्टा सरकारले चुरोटमा अतिरिक्त कर लगाएको भन्दै जनताले बनर्जीप्रति आक्रोश पोखेका छन् । चिट-फन्ड कम्पनीको विषयमा भइरहेको वहसले केही दिनयता पश्चिम बंगालको राजनीति निकै तातेको छ । चिड फन्डमा लगानी गर्ने हजारौँ नागरिकले आफ्नो लगानी गुमाएका छन् । चिट फन्ड नामले चिनिएको शारदा ग्रुप कम्पनीका राजनेता तथा पत्रकारसँग भएको सम्बन्धका विषयमा समेत प्रश्न उठिरहेको छ ।

एजेन्सी
ढाका, ११ वैशाख
बंगलादेशको राजधानी ढाकाको बाहिरी भागमा अवस्थित आठतले भवन भत्कँदा एक सयभन्दा बढीको मृत्यु भएको छ । साभर क्षेत्रमा भएको दुर्घटनामा सात सयभन्दा बढी घाइते भएको सरकारी अधिकारीलाई उद्धृत गर्दै अलजजिराले जनाएको छ ।
उद्धारकर्मीले भवनको भग्नावशेषमा पुरिएकाहरूको उद्धार कार्य जारी राखेको प्रहरीले जनाएको छ । क्रेनको मद्दतले भग्नावशेष हटाउने कार्य भइरहेको छ । घाइतेलाई नजिकैको अस्पतालमा भर्ना गरिएको छ । घाइतेको चाप अत्यधिक भएकाले सहज रूपमा उपचार दिन नसकिएको चिकित्सक इमरुल हसनले जनाएका छन् ।
दुर्घटना भएको भवनमा कपडा कारखाना, बैंक तथा केही पसल थिए । बुधबार बिहानको व्यस्त समयमा भवन भत्केको प्रत्यक्षदर्शीले बताएका छन् । दुर्घटनालगत्तै दर्जनाँै मानिस आफन्त तथा साथीभाइ खोज्न घटनास्थल पुगेका थिए । दुर्घटनापछि सो क्षेत्रमा कोलाहल मच्चिएको एक प्रत्यक्षदर्शीले बताएका छन् । मंगलबार सो भवनको भित्ता चर्केको देखिएको स्थानीय बासिन्दाले बताएका छन् । भवन चर्केको देखेपछि कामदारलाई भवन प्रवेश नगराउन गरिएको आग्रह गार्मेन्टका मालिकले नमानेको कारण दुर्घटनामा धेरै व्यक्तिको निधन भएको साभरका प्रहरीप्रमुख मोहम्मद असादुजामानले बताएका छन् । बुधबार बिहान एक्कासि भत्कन सुरु गरेको भवन केही समयमै ध्वस्त भएको प्रहरीले सञ्चारकर्मीलाई जनाएको छ । भवनको भुइँतला भने जस्ताको तस्तै रहेको अधिकारीले जनाएका छन् । भवन भत्कन सुरु भएलगत्तै आफूहरू अत्तालिएको दुर्घटनामा बाँच्न सफल भएकाहरूले बताएका छन् । 'गार्मेन्टमा काम गरिरहेको समयमा अचानक मैले ठूलो आवाज सुनेँ, त्यसको केही मिनेटभित्रै भवन पूरै ध्वस्त भयो,' स्थानीय सोमोय टेलिभिजनलाई एक प्रत्यक्षदर्शीले भने । दुर्घटनाको कारण हालसम्म पत्ता लाग्न सकेको छैन ।
भवन भत्केलगत्तै विपक्षी दलले उद्धार कार्यमा सघाउन भन्दै बुधबारका लागि आह्वान गरेको ढाका बन्द फिर्ता लिएको छ । बंगलादेशमा गत नोभेम्बरमा एक गार्मेन्टमा आगलागी हुँदा एक सय १० जनाको मृत्यु भएको थियो । कारखानामा पर्याप्त सुरक्षा प्रबन्ध नमिलाइएका कारण धेरै मानिसको मृत्यु भएको भन्दै प्रदर्शनसमेत भएको थियो । यसअघि सन् २०१० मा ढाकामा चारतले भवन भत्कँदा २५ जनाको मृत्यु भएको थियो । भवन निर्माण संहिता पालना नगर्दा बंगलादेशमा समय-समयमा दुर्घटना हुने गरेका छन् ।

एजेन्सी
बेइजिङ, ११ वैशाख
चीनको सिन्जियाङ प्रान्तमा मंगलबार प्रहरी र हतियारधारी युवाबीच भएको झडपमा २१ जनाको मृत्यु भएको छ । भिडन्तमा मृत्यु हुनेमा १५ प्रहरी तथा सामाजिक कार्यकर्ता रहेको अधिकारीले जनाएका छन् । त्यस्तै, मृत्यु हुने अन्य सन्दिग्ध आतंककारी रहेको प्रहरीले जनाएको छ ।
आतंककारी समूहले सुनियोजित रूपमा प्रहरीमाथि आक्रमण गरेको चिनियाँ विदेश मन्त्रालयले जनाएको छ । हतियार लुकाएको आशंकामा सामाजिक कार्यकर्ताले स्थानीय मानिसको घरमा खानतलासी गरेपछि झडप सुरु भएको सिन्जियाङ प्रान्तकी प्रोपोगान्डा विभाग प्रमुख होउ हानमिनले
बताएकी छिन् ।
पश्चिमी चीनको सिन्जियाङ प्रान्तस्थित कसगार क्षेत्रमा सो घटना घटेको हो । कसगार प्रायः जातीय दंगा हुने क्षेत्रका रूपमा चिनिन्छ । स्थानीय तीनजनासँग अवैधानिक हतियार तथा छुरी रहेको स्थानीयले पत्ता लगाएपछि प्रहरीलाई खबर गरेका थिए । खबरलगत्तै हतियार अनुगमनका लागि प्रहरी त्यहाँ पुगेको थियो । अनुगमनमा गएका प्रहरीले केही स्थानीय बासिन्दाको घरबाट हतियार नियन्त्रणमा लिएको विरोधमा गाउँलेले प्रहरीमाथि नै आक्रमण गरेका थिए । पछि, थप प्रहरी घटनास्थल पुगेर स्थिति नियन्त्रणमा लिएको चिनियाँ समाचार संस्था सिन्ह्वाले जनाएको छ । घटनामा सन्दिग्ध आठ आतंककारीलाई प्रहरीले पक्राउ गरी आवश्यक सोधपुछ जारी राखेको छ । प्रारम्भिक अनुसन्धानका क्रममा पक्राउ परेका व्यक्ति आतंकवादी भएको खुल्न आएको प्रहरीले जनाएको छ । सो घटनापछि बुधबार बिहानैदेखि प्रहरीले अनुसन्धान सुरु गरेको छ ।
सिन्जियाङ प्रान्तमा केही वर्षयता हिंसाका घटना हुँदै आएका छन् । यसअघि सन् २००९ मा मुस्लिम अल्पसंख्यक उइगुर समुदाय तथा चिनियाँ हान समुदायसबीच भएको झडपमा दुई सयभन्दा बढीको मृत्यु भएको थियो ।