एजेन्सी
नयाँदिल्ली, १ जेठ
गत डिसेम्बरमा नयाँदिल्ली सामूहिक बलात्कारका एक अभियुक्तको स्वास्थ्यस्थिति गम्भीर भएपछि उनलाई अस्पताल भर्ना गरिएको छ ।
अभियुक्त विनय शर्मालाई कारागारमा कुटपिट गर्नुका साथै विष खुवाइएपछि अस्पताल भर्ना गरिएको उनका वकिल एपी सिंहले बताएका छन् । मंगलबार कुटपिटपछि घाइते भएका शर्मालाई जयप्रकाश नारायण अस्पतालमा भर्ना गरिएको सो अस्पतालका चिकित्सकले पुष्टि गरेका छन् । उनको स्वास्थ्यस्थितिबारे अस्पतालले केही बताएको छैन । पीडित शर्माको अवस्था गम्भीर रहको उनका वकिल सिंहलाई उद्धृत गर्दै एफपीले जनाएको छ । कारागारका अधिकारीले शर्माको खानामा विष मिसाएका कारण उनले रगत बान्ता गरेको सिंहको आरोप छ । अभियुक्तको सुरक्षाको विषयलाई लिएर आफूले बारम्बार प्रश्न उठाउँदै आए पनि सुरक्षा अधिकारीले बेवास्ता गरेको
सिंहले बताए ।
यसअघि दिल्ली सामूहिक बलात्कारका एक अभियुक्त राम सिंहले २३ मार्चमा जेलमै पासो लगाएर आत्महत्या गरेका थिए । सिंहलाई कारागारका अधिकारी तथा जेलमा रहेका अन्य कैदीले मानसिक यातना दिएका कारण उनले आत्महत्या गरेको परिवारले दाबी गरेको छ । राम सिंहको आत्महत्याबारे छानबिन भइरहे पनि प्रतिवेदन भने सार्वजनिक भएको छैन ।
डिसेम्बरमा बलात्कृत २३ वर्षे युवतीको उपचारका क्रममा निधन भएपछि ६ अभियुक्तलाई पक्राउ गरिएको थियो । उनीहरूको मुद्दा फास्ट ट्रयाक अदालतमा चलिरहेको छ । घटनापछि महिला सुरक्षाको विषयलाई लिएर भारतभर कैयाँै दिन प्रदर्शनसमेत भएको थियो ।

एजेन्सी
इस्लामाबाद, २९ वैशाख
पाकिस्तानी पूर्वप्रधानमन्त्री नवाज सरिफले शनिबार सम्पन्न आमचुनावमा आफ्नो पार्टीले जित हासिल गरेको घोषणा गरेका छन् । प्रारम्भिक मतपरिणामअनुसार सरिफ नेतृत्वको पाकिस्तानी मुस्लिम लिग-नवाज -पिएमल-एन) सबैभन्दा ठूलो दल बन्ने निश्चित भएको अन्तर्राष्ट्रिय सञ्चारमाध्यमले जनाएका छन् । चुनावको मतपरिणामसँगै सरिफ तेस्रोपटक प्रधानमन्त्री बन्ने निश्चित भएको छ ।
शनिबारको चुनावमा कुल आठ करोड ६० लाख मतदाताको ६० प्रतिशत मात्र मत खसेको निर्वाचन आयोगले जनाएको थियो । १९७७ को आमचुनावपछि यति धेरै जनताले मतदान गरेको यो पहिलोपटक भएको आयोगले जनाएको छ । पाकिस्तानमा पहिलोपटक एक जननिर्वाचित निकायले अर्को जननिर्वाचित निकायलाई चुनावमार्फत सत्ता हस्तान्तरण गर्ने भएकाले पनि चुनाव परिणामलाई निकै चासोका साथ हेरिएको छ । पाकिस्तानको ६६ वर्षको इतिहासमा करिब ५० वर्ष सेनाले शासन चलाइसकेको छ ।
चुनाव परिणाम सार्वजनिक भएलगत्तै लाहोरस्थित चुनाव प्रचार मुख्यालयमा रहेका सरिफले परिसरमा भेला भएका कार्यकर्तालाई धन्यवाद दिएका छन् । पाकिस्तानी जनताले आफूलाई कति माया गर्छन् भन्ने कुरा
मतपरिणामले प्रस्ट पारेको उनले बताए । 'जनताले मलाई माया गरेभन्दा दुईगुणा बढी म जनतालाई माया गर्छु,' उनले भने । देश तथा जनताको सेवा गर्ने अवसर प्रदान गरेको भन्दै उनले ईश्वरलाई धन्यवाद दिएका छन् । उनले चुनावको समयमा गरेको वाचा पूरा गर्ने कसमसमेत खाए ।
गठबन्धनविना नै सत्ता सञ्चालन गर्न सके स्वतन्त्र ढंगले काम गर्न सकिने उनले बताए । राष्ट्रिय सभाका कुल दुई सय ७२ स्थानमध्ये सरिफ नेतृत्वको दल एक सय १९ सिटमा अग्रस्थानमा छ । चुनावको पछिल्लो मतपरिणामअनुसार पूर्वक्रिकेटर इमरान खान नेतृत्वको तहरिक-ए-इन्साफ दोस्रो स्थानमा रहेको छ । उनको दलले ४० स्थानमा जित सुनिश्चित गरेको जनाइएको छ । भ्रष्टाचारविरोधी अभियान चलाउनुका साथै पाकिस्तानी भूमिमा अमेरिकी ड्रोन हमलाको विरोध गरेका कारण खानको पार्टी दोस्रो स्थानमा उक्लेको अलजजिराले जनाएको छ । आफ्नो दल दोस्रो ठूलो दल बन्न लागेको खुसी व्यक्त गर्दै खानले जिम्मेवार प्रतिपक्षको भूमिका निर्वाह गर्ने बताए ।

एजेन्सी
इस्लामाबाद, २६ वैशाख
पाकिस्तानका पूर्वप्रधानमन्त्री युसुफ रजा गिलानीका छोरालाई अज्ञात बन्दुकधारीले चुनावी र्‍यालीबाट अपहरण गरेका छन् ।
पाकिस्तान पिपुल्स पार्टी -पिपिपी)का उम्मेदवार रहेका आफ्ना छोरा अलि हैदर गिलानीलाई चुनावी मुल्तानको चुनावी र्‍यालीबाट बिहीबार अपहरण गरिएको बुबा गिलानीको भनाइ उद्धृत गर्दै बिबिसीले जनाएको छ ।
मुल्तानस्थित फरख टाउन क्षेत्रमा बिहीबार भएको चुनावी र्‍यालीलाई लक्षित गरी गरिएको आक्रमणमा एकजनाको मृत्यु भएको छ । मृत्यु हुनेमा अलि हैदरका निजी अगंरक्षक रहेको आशंका गरिए पनि पहिचान खुल्न सकेको छैन ।
आक्रमणकारी कार तथा
मोटरसाइकलमा आएका र उनीहरूले र्‍यालीलाई लक्षित गरी अन्धाधुन्ध गोली चलाएको एक प्रत्यक्षदर्शीले बताए । जियो टेलिभिजनसँग कुरा गर्दै ती प्रत्यक्षदर्शीको गोली प्रहारबाट एक व्यक्ति घटनास्थलमै ढलेपछि उनीहरूले गिलानीलाई घिसारेर कारमा राखेर भागेको बताए । अलि हैदरलाई पनि गोली लागेको ती प्रत्यक्षदर्शीको भनाइ छ । आक्रमणमा पाँचजना घाइते भएको प्रहरी अधिकारी खुराम साकिरले बताएका छन् । आक्रमणको जिम्मा हालसम्म कसैले लिएका छैनन् । अलि हैदर पन्जाबबाट प्रान्तीय सभामा चुनाव लड्दै छन् । पाकिस्तानमा आउँदो शनिबार
मतदान हुँदै छ ।

पिएमएल (एन)माथि आरोप

गिलानीले र्‍यालीमा गरिएको आक्रमणको दोष नवाज सरिफ नेतृत्वको पाकिस्तान मुस्लिम लिग -नवाज)माथि लगाएका छन् । उनले यस विषयमा राष्ट्रपति असिफ अलि जर्दारी तथा सेनाप्रमुख अस्फाक परभेज कियानीसँग कुराकानी गरेको बताए । भाइ बिहीबार रातिसम्म सकुशल फिर्ता नभए आफ्नो क्षेत्रमा चुनाव हुन नदिने दाजु अलि मुसाले बताए । प्रहरीले हाल मुल्तान प्रवेश गर्ने र बाहिर जाने नाका बन्द गरी खोजी कार्य तीव्र पारेको पाकिस्तानी सञ्चारमाध्यमले जनाएका छन् ।
युसुफ रजा गिलानी पाकिस्तानी राजनीतिका प्रभावशाली व्यक्ति हुन् । राष्ट्रपति असिफ अलि जर्दारीविरुद्धको भ्रष्टाचारको मुद्दाको छानबिन गर्न अस्वीकार गरेको आरोपमा जुन २०१२ मा सर्वोच्च अदालतले उनलाई अयोग्य ठहर गरेको थियो ।
अदालतले अयोग्य ठहर गरेका
कारण युसुफ रजा गिलानी चुनावमा उम्मेदवार हुन पाउने छैनन् । तर, उनका तीनवटा छोरा अब्दुल कादिर गिलानी, अलि मुसा गिलानी तथा अलि हैदर गिलानी चुनावी मैदानमा उत्रेका छन् ।
पाकिस्तानमा आउँदो शनिबार आमचुनाव तथा प्रान्तीय सभाको चुनाव हुँदै छ । बिहीबार चुनाव प्रचारको अन्तिम दिन हो । पाकिस्तानमा चुनावको घोषणालगत्तै हत्याहिंसाका घटनामा वृद्धि हुन थालेको छ । चुनावको मिति घोषणा भएयता कम्तीमा पनि एक सय १० को मृत्यु भइसकेको छ ।
आफ्नो संगठनविरुद्ध कडा रवैया अपनाएको आरोप लगाउँदै तालिवान विद्रोहीले पिपिपी, अवामी नेसनल पार्टी -एएनपी) तथा मुत्तहिद क्वामी मुभमेन्ट -एमक्युएम)को चुनावी सभा तथा कार्यालयलाई लक्षित गरी आक्रमण गर्दै आएका छन् । पाकिस्तानमा हाल तालिवानको समर्थन तथा विरोधमा राजनीतिक दलहरू बाँडिएको पूर्वगृहमन्त्री रहमान मल्लिकले बताए ।

एजेन्सी
लाहोर, २४ वैशाख
पाकिस्तानी राजनीतिज्ञ तथा पूर्वक्रिकेटर इमरान खान करिब १४ फिट उचाइको लिफ्टबाट खसेर घाइते भएका छन् । चुनावी कार्यक्रममा भाषण गर्ने क्रममा अग्लो स्टेजमा पुग्न उनले लिफ्ट चढेका थिए ।
खानको पार्टी तेहरिक ई इन्फास -पिटिआई)ले लाहोरमा आकर्षक स्टेज तयार पारेको थियो । त्यहाँ खानको भाषण सुन्न हजारौँ मानिस उपस्थित थिए । पिटिआईले आफ्ना नेता खानका लागि स्टेजसम्म पुर्‍याउन लिफ्टको व्यवस्था गरेको थियो ।
पिटिआईका नेता खान करिब २० फिट अग्लो स्टेजसम्म लिफ्टको माध्यमबाट चढ्ने कार्यक्रम तय थियो । तीन सहकर्मीका साथ खान स्टेजमा चढे । स्वचालित लिफ्टमा खान आफ्ना समर्थकलाई हात हल्लाउँँदै माथि चढे । लिफ्टमा पाकिस्तानका पूर्वक्रिकेटर अब्दुल कादिर खान पनि सँगै थिए ।
लिफ्ट माथि उठिसकेपछि अचानक एक समर्थक चढ्न खोजेपछि खानले पनि हात दिएर उनलाई माथि तान्ने प्रयास गरेका थिए । लिफ्टको माथिल्लो भागमा धेरै मान्छे अटाउने अवस्था थिएन । ओभरलोड भएर लिफ्ट असन्तुलित भयो । त्यसपछि खानसँगै तीन व्यक्ति एकैपटक गल्र्यामगुर्लुम भुइँमा खसेका थिए ।
जमिनसम्म पुग्दा खानको शरीर तीन-चारपटक गुल्टी खेलेको दृश्य पाकिस्तानको निजी टेलिभिजन दुनियाँले लाइभ प्रसारण गरेको छ । खानको टाउको भुइँमा बजारिएलगत्तै समर्थकबीच कोलाहल मच्चियो र खानका एडिसीले उनलाई एम्बुलेन्सतर्फ दौडाएका थिए । उनलाई सौकत खान अस्पतालमा भर्ना गरिएको छ । अस्पतालका अनुसार खानको शरीर तथा टाउकोमा चोट लागेको छ ।
'यो सत्य समाचार हो, हाम्रा नेता इमरान खान लिफ्टबाट खसेका हुन्, टाउकोमा चोट लागेको छ, त्यति गम्भीर भने छैन,' पिटिआईका प्रवक्ता मलिक इख्तिरले एएफपी समाचार संस्थासँग भने । सामान्य उपचारपछि खान पूर्वनिर्धारित कार्यक्रममा सहभागी हुन सक्ने उनले जानकारी दिएका छन् ।
अर्को साता पाकिस्तानमा आमनिर्वाचन हँुदै छ । खानको पार्टी पिटिआई दोस्रो ठूलो हो । सन् २००२ को चुनावमा खानले एक सिट जितेका थिए । सन् २००८ मा विद्युतीय माध्यमबाट चुनाव हुने भएपछि खानले बहिष्कार गरेका थिए । ६१ वषर्ीय पिटिआईका नेता खानले सन् १९९२ मा पाकिस्तान क्रिकेट टोलीको नेतृत्व गर्दै विश्वकप क्रिकेट प्रतियोगिताको उपाधि दिलाएका थिए । विश्वकपको उपाधिसँगै खानले अन्तर्राष्ट्रिय क्रिकेट क्षेत्रबाट सन्न्यास लिएका थिए ।